За 2023 год насельніцтва Беларусі скарацілася амаль на 45 тысяч чалавек. Хутчэй за ўсё змяншаецца Віцебская вобласць. Пра гэта гаворыцца ў свежых звестках Нацыянальнага статыстычнага камітэта, апублікаваных 28 сакавіка.
На 1 студзеня 2024 года насельніцтва Беларусі склала 9 155 978 чалавек. Гэта на 44 639 менш, чым за год да гэтага. Фактычна знік цэлы райцэнтр — прыкладна такі, як Ваўкавыск ці Слонім.
Насельніцтва страчваюць усе рэгіёны без выключэння, у тым ліку Мінск, які ўжо трэці год знаходзіцца ніжэй за планку 2 млн чалавек. А мацней за ўсё зменшылася колькасць жыхароў у Віцебскай вобласці — гэты рэгіён, і так адзін з самых нешматлюдных, страціў 10 тысяч чалавек.
| Рэгіён | 2022 | 2023 | 2024 |
|---|---|---|---|
| Брэсцкая вобласць | 1 324 027 | 1 315 405 | 1 308 569 |
| Віцебская вобласць | 1 103 833 | 1 091 948 | 1 081 911 |
| Гомельская вобласць | 1 357 897 | 1 347 469 | 1 338 617 |
| Гродзенская вобласць | 1 006 614 | 998 600 | 992 556 |
| Мінск | 1 996 553 | 1 995 471 | 1 992 862 |
| Мінская вобласць | 1 465 755 | 1 462 021 | 1 460 289 |
| Магілёўская вобласць | 1 000 845 | 989 703 | 981 174 |
На пачатак 2024-га ў гарадах жыло 7,212 млн чалавек, у вясковай мясцовасці — 1,988 млн. За год гарады страцілі 14 тысяч чалавек, а вёскі — 30,5 тыс.
Насельніцтва Беларусі скарачаецца шмат гадоў запар. Да 1994 года ўключна яно расло, але потым пачало няўхільна змяншацца. Выключэннем былі толькі 2015−2016 гады, калі быў адзначаны невялікі рост на 20 тыс. чалавек. З 1994 года, за трыццаць гадоў кіравання Лукашэнкі, у нашай краіне стала на 1 087 528 жыхароў менш.
Рэкорднае падзенне насельніцтва было зафіксаванае ў 2021-м — за той год знікла 94 тысячы чалавек.
Адна з прычын — масавая эміграцыя беларусаў з прычыны сфальсіфікаваных выбараў 2020 года, жорсткага здушэння пратэстаў і масавых рэпрэсій у дачыненні да нязгодных з дзейнай уладай, якія з таго часу не спыняюцца. Аднак звесткі Белстата адлюстроўваюць гэтае змяншэнне далёка не цалкам, бо ў афіцыйную статыстыку трапляюць толькі тыя, хто з’ехаў, хто аформіў выезд на пастаяннае месца жыхарства і страціў рэгістрацыю ў Беларусі. Адпаведна, рэальная колькасць насельніцтва, якое застаецца ў Беларусі, меншая за афіцыйныя 9,15 млн чалавек.
Ацэнкі колькасці тых, хто з’ехаў, розныя, але ў любым выпадку гэта сотні тысяч. Так, у Дэпартаменце па грамадзянстве і міграцыі МУС лічаць, што толькі ў 2021 і 2022 годзе з’ехала больш за 200 тысяч чалавек. У кастрычніку 2023 года намеснік міністра ўнутраных справаў Мікалай Карпянкоў ацаніў колькасць тых, хто з’ехаў з Беларусі, у 350 тысяч чалавек. Раней гучалі розныя ацэнкі эміграцыі беларусаў з пачатку рэпрэсій у 2020 годзе — ад больш чым 100 тысяч да 500 тысяч.
Чытайце таксама
